Plz No More Sliders!

جوني كارينوز مطعم كبير جداً … وعلى قولت المعلق الجزائري ..مطعم هاااايل …وما اقدر أوفيه حقه …بس هاليومين لازم يمشي مع الهبة …وللأسف مشى معاها..الهبة اهي هبة السلايدرز … فقام وسوى سلايدرز كرات لحم ؟!

Naif Chicken Vs Mr. Fero

مطعم نايف مطعم شهادتي فيه مجروحة كونه مطعم كويتي ويقدم فاست فوود بنفس بطيء نظرا لطبيعة الاكل المشوي…طلبي فيه عبارة عن قصيدة ارددها بين الفينة والأخرى كلما جعت …وكلما جاء على بالي دجاج مشوي …كان نايف احد الحلول …عالعموم ذهبت مؤخرا وطلبت طلبي المعتاد …واذا بالمفاجأة ..احد الأكياس كان غريبا …ويكاد يكون من مطعم اخر..شالسالفة ؟!…شصاير ؟! حسب تحليلي المتواضع …زيادة الأسعار في شتى المجالات لها أوجه عديدة … واني اكاد ان استشف زيادة اسعار قادمة مغلفة بلوجو جديد وقائمة طعام جديدة …لنفرض ان هذا اللوجو عبارة عن تغيير لاسم المطعم …فما أتمناه ان يظل دجاج نايف المعتاد وليس مسترفيرو لأني مو مستعد اكل لحم دياكة …

Cautious : Heinz in South East Asia !

عند زيارتك لأي من دول جنوب شرق اسيا مثل سنغافوره تأكد من شي خطير ومهم قد يفسد عليك متعة الطعام ويقلبه راسا على عقب ..الكاتشب وما ادراك ما الكاتشب ؟!..شركة هاينز الموقرة صنعت مشكوره تشيلي صوص على شكل بطول هاينز العريقه و اكياس كاتشب صغيرة بنفس الطريقة لزوم الاكل السريع …المهم كنت في يونيفرسال ستوديوز اللي فتحت هالسنة في سنغافورة في جزيرة سنتوسا …وكنت يوعان حدي ..فلقيت مطعم موجود بالاصل في هوليوود على الطريقة الامريكية البحتة …جوني روكتس ستايل …دشيت والا الخدعة الاولى ..الاكل جاهز حاله حال اي مطعم في المدن الترفيهية ..لزوم تقديم اكثر ما يمكن بأقل وقت متاح ..قلت مو مشكلة خل اطلب واجرب …طلبت تشيز برجر وبطاط …ورحت خذيت كمية لا يستهان بها من الكاتشب …وبدأت تسبيح الوجبة بالكاتشب حتى غرقت بالكامل …ومن اول قرمة اكتشفت الخدعة الثانية …الوجبة كانت غرقانة بالتشيلي صوص ؟! ما تترقع كلش …قمت خذيت كاتشب هالمرة لأنقذ الموقف ..وترستها عسى ترجع الى الوضع اللي ابيه…طبعا الفرق بين الكاتشب والتشيلي يكاد يكون معدوم للجواعى واللى يأكلون الفاست فوود بأسرع من تحضيره عمياني ستايل !! من عقبها صار الاجراء المتبع في كل المطاعم التأكد من الكاتشب اكثر من التاكد من وجود البوك في المخباة !! ملاحظة : كنت في مطعم اخر ومو بس هاينز …ماركة محلية اخرى.. و هم نفس الطريقة

Unusual Review : Afendim

مطعم أفندم مطعم تركي في ميدان حولي على الدوار المقابل لقصر الشعب … المطعم مكانه موذاك الزود وصعب تلاقي مصفط فيه مثل الاوادم .. لكن أكله مو صج .. خصوصا مع شح المطاعم التركية بالكويت وزيادة المسلسلات التركية على قنوات الفضائيات .. في البداية يحطلك شوية زعتر وصوص أحمر ماذقته وشوية جبن على جنب  عبارة عن ضيافة تركية

ودايما يكون مع الخبز مسمسم عليه الحب الاسود يكون حار من التنور..طبعا طلبنا ما لذ وطاب من المقبلات الباردة والحارة مع الاطباق الرئيسية التركية ..الفتوش حلو مع الخبز المحمص المزعتر

نسيت شغلة طبعا مهمة الا وهي الماي  اللي بالصورة مع القلاص المايل  المو مستقيم مثل امور كثيرة عندنا بالبلد .. هذا ولا انسى طبعا الدايت كولا بعد ما يبيله.. اللي كان حاضر بقوة على الطاولة

من المقبلات المهمة على الطاولة كان حمص مع المحمرة له اسم تركي غلج .. وبالزاوية تحت لبنه أو شي من هذا القبيل مدممة باللون الاحمر ..مو كاتشب ومايونيز بتاع شارع المطاعم

طبعا بما انه مطعم تركي مشهور بالمشاوي التركية …ما راح اتكلم عنها ….بس طبعا راح اتكلم عن بطاطا حاره قوية جدا من النوع المدمر اللي ما تلقاه باي مطعم بالكويت..وتقدر تختمها بعد المشاوي بفطوم خانو

تشكرات افندم بطني جوكوزال

Unusual Review : Rustica

بيتزا روستيكا واحد من مطاعم الشايع الاخطبوطية المتواجده في الافينيوز ..موجود في الفوود كورت على كتر مقابل ابل بيز..طبعا المطعم مشهور بالبيتزا الايطاليه الساخنة من الفرن  مباشرة وأيضا الكالزوني (البيتزا المسكره المستحية اللي ما تبي توري الناس شنو فوقها) في البداية يضبطك المطعم بخبز طلياني وصوص طمام وزيتون اخضر .. نعتذر عن عدم توفر الصوره الاصلية  حيث علم ايطاليا يكفي بالوانه الطماطية والزيتونية.. طبعا ما يطوفني اي مطعم الا وأتذوق الدايت بيبسي اللي كان كبير من الجليبي يروي عطش أكلي البيتزا..علامة تحسب له

وبما ان المطعم مشهور بالبيتزا..فما راح اتكلم عن البيتزا في المطعم ..طلبت طلب الستيك بصوص الليمون  مع سايد السلطة.. طبعا الطلب لولا صوص الانقاذ الا وهو الكاتشب لكان كارثة تحل على ذوق معدتي .. فكان  الكاتشب خير منقذ ومحسن لطعم هذا الطبق

ملاحظة : الصوص الاحمر اللي على جنب مو كاتشب.. عبارة عن دقوس بارد ..لم ينفع ويشفع للطلب .. والسلطة اللي فوق عبارة عن جم خسه وطماط مقصص بدون اي صوص سلطه

Unusual Review : Mais Al Ghanim

  ميس الغانم مطعم غني عن التعريف بمشوياته وموقعه وتاريخه واسعاره…صار لي دهر اكل منه وكله من الاكل اللبناني المعتاد من المقبلات الباردة والساخنه واطباق المشاوي المتنوعه…بس في أخر مره رحتله كان مع خبير الخفايا التحضيرية والتذوقية في شؤون الفلافل وتوابعها .. ترك  المينيو الملغوم بالطلبات القوية … وطلب طلب ممكن ينطلب بكناري ولا نواره ..او اذا اشوي امبحبحها الكلحه…طلب فلافل ؟!! على الرغم انه الطلب ما كان بوقته …بس كان قوي حسب معاييره التحضيرية والتذوقية الخاصة في شؤون الفلافل على الخليج العربي 

Unusual Review : Romano’s Macaroni Grill

ماكاروني جريل مطعم ايطالي أمريكي المنشأ موجود في الافينيوز الجهة الخارجية مقابل ايكيا طبعا المطعم ما عليه دوس..ممكن لانه مكانه ما اخدمه ..أو لانه الكويتيين اهل هبات .. او يمكن لانه مو ذاك الزود..مو هذا المهم المهم التقييم الغير معتاد للمطعم.. المينيو غني وواضح بالاطباق  مع بعض الصور المدعمه اللي تبين الاطباق (يعني ماراخ يكون براشيم أو الغاز نفس بعض المطاعم) ..اسم الويترس أو الويتر راح ينكتب على الطاوله با لوان شمعية ..وتكون هذه الالوان مسلية لتمارس رسوماتك اللهوية اللي كنت ترسمها بالمرحلة الابتدائية …يقدم لك اول شي خبز ايطالي مع زيت الزيتون بالفلفل الاسود عشان تغمس على راحتكوما يفوتني أي مطعم الا واتذوق الدايت بيبسي .. اللي كان منعش مع قطع الثلج المتروسه ..وخدمة اعادت التعبئة اللازمة طبعا في هذا النوع من المطاعم

Chocolate Indulgenceوأخيرا وليس اخرا الحلو… الحلو والمجكنم ذوي القرنين